Желтоқсан айының 9-12 жұлдызы аралығында тоғызқұмалақтан Көкшетау қаласында ҚР Тоғызқұмалақ Қауымдастығы мен Ұлттық спорт түрлерінен облыстық балалар мен жасөспірімдер спорт мектебінің ұйымдастыруымен тәуелсіздік күніне арналған жарыс өтті. Республикалық деңгейдегі бұл жарысқа Астана қаласы, Солтүстік Қазақстан облысы және Ақмола облысынан спортшылар қатысты. Турнир ойыншылардың жас ерекшеліктеріне қарай 3 топқа бөлініп өткізілді. Бірінші топ - 1993 ж. және одан бұрын туылған спортшылар, екінші топ - 1994-1996 жж. туылған спортшылар, үшінші топ - 1997 ж. және одан кейін туылған спортшылар. Швейцариялық жүйемен өткізілген жарысқа барлығы 66 спортшы қатысты.
Жарыстың басты ерекшелігі ойын рапид түрінде өткізілді, яғни әр ойыншыға жиырма минуттан уақыт берілді. Бұл спортшылардан тек шебер ойын танытуды ғана емес, жылдам есептеу мен қырағылықты да қажет етті. Турнир ІІІ-топ спортшылары үшін ерлер және қыздар арасында жеке-жеке өткізілсе, басқа жас ерекшеліктерінде аралас болды. Ойыншылар арасындағы тайталас тартысты өткендіктен жарыс соңына дейін қай ойыншының жеңімпаз болатыны толық белгілі болмады. Сондықтан жеңімпаздар олардың жекелей кездесулерінен басқа коэффициенттік есептеу көрсеткіштері бойынша анықталып отырды.
Жарыстың ашылу салтанатында сөз сөйлеген ҰСТОБЖСМ директоры М.Қойшин және тоғызқұмалақтан мемлекеттік жаттықтырушы М.Шотаев мырзалар егемендіктің еліміз үшін маңыздылығына, тарихына тоқтала отырып, барша спортшыларға сәттіліктер тіледі.

Тәуелсіздік күніне арналған турнирдің нәтижесі төмендегідей болды:
І топ бойынша
І орын - Сыздықов М. (Көкшетау)
ІІ орын - Рыспамбетов Ә. (Қызылжар)
ІІІ орын - Абсаматов Б. (Көкшетау)

ІІ топ бойынша
І орын - Сабитов Ә. (Зеренді)
ІІ орын - Курмангожина А. (Зеренді)
ІІІ орын - Амангелдина З. (Қызылжар)

ІІІ топ бойынша, ерлер арасында         
І орын - Елтай Н. (Қызылжар)              
ІІ орын - Хаділбек Б. (Астана)             
ІІІ орын - Өмірбек Р. (Қызылжар)                   
қыздар арасында
І орын - Абен Ж. (Астана)
ІІ орын - Салим А. (Зеренді)    
ІІІ орын - Кошубай Ж. (Қызылжар)

Осылайша жүлделі орындардың барлығы дерліктей Ақмола облысы спортшыларының қанжығасына байланды. Жарыс соңында жеңімпаздар ҚР Тоғызқұмалақ Қауымдастығы дайындаған медаль, диплом және арнайы сыйлықтармен марапатталды.
    Ырысбай АБДУЖАППАРОВ