Тоғызқұмалақ тарихында және бір тарихи тұңғыш оқиға болды. 2009 жылы 19-26 қазан аралығында Шымкентте тоғызқұмалақтан І Азияның ашық чемпионаты болып өтті. Чемпионатқа 9 елден барлығы 31 ойыншы қатысты:  Қазақстан, Қырғызстан, Өзбекстан, Азербайжан, Түркмения, Ресей, Монғолия, Қытай, Түркия. Ойын швейцариялық жүйе бойынша 7 турдан тұрды. Ойын нәтижесі төмендегідей:
ерлер арасында
1 орын Айдос Сейтжанов (Астана/Қазақстан),
2 орын Серік Ақтаев (Павлодар/Қазақстан),
3 орын Ғалымжан Темірбаев (Оңтүстік Қазақстан облысы/Қазақстан);
ал қыздар арасында:
1 орын Диана Кенина (Павлодар/Қазақстан),
2 орын Әсел Далиева (Қызылорда/Қазақстан),
3 орын Салтанат Сапарбековаға (Оңтүстік Қазақстан облысы/Қазақстан)      бұйырды.

Командалық есепте ерлер арасында:
1 орын - Қазақстан
2 орын - Қырғызстан
3 орын - Монғолия

қыздар арасында:
1 орын - Қазақстан
2 орын - Қырғызстан
3 орын - Өзбекстан

Осылайша Азия жеңімпазы атағын өзара бөліске салған отандастарымыз шетелдік ойыншыларға дес бермеді. Жалпы жарыстың өту барысы мен ұйымдастыру деңгейі өте жоғары өтті деп айтуға болады. Жарысқа өз елдерінің мықты спортшылары қатысты, соның ішінде қырғызстандық екі халықаралық дәрежедегі спорт шеберлері де қатысқанын атап айтқан жөн. Жарыс жеңімпаздары арнайы диплом және медалдармен марапатталды. Чемпионат барысындағы тағы да бір маңызды шара ол - спорт шеберлері арасындағы соңғы шешуші ойындардың www.9kumalak.kz сайтында әрбір жүрістен соң жарияланып отырылуы еді. Осы арқылы І Азияның ашық чемпионатына қызығушылық білдіріп отырған әлемнің кез келген түкпірінен азаматтар бақылап қызықтай алды.
Келесі Азия чемпионаты 2011 жылы Қырғызстанда өтетін болып жоспарланды. Ал қазақ ақыл-ой спортының майталмандары келесі жылы Астана қаласында өтетін Әлем біріншілігіне дайындықты пысықтауда.